Heimspekitorg

Heimspekileg æfing 22. nóvember

ATHUGIÐ! Breyttur tími á næstu heimspekilegu æfingu:

Fimmtudaginn 22. nóvember 2012 kl. 20.00 verður heimspekileg æfing í stofu 301 í Gimli, Háskóla Íslands. Kristian Guttesen og Ylfa Björg Jóhannesdóttir munu kynna verkefni sem þau settu saman fyrir nemendur í Háskóla unga fólksins. Verkefnið heitir Borðspilagerð: Heimspeki og sókratísk samræða.

Allir eru velkomnir og aðgangur er ókeypis.

Samræða um hamingju

Nemendur í 10. bekk við Réttarholtsskóla sem leggja stund á heimspeki taka þátt í svo kölluðu etwinning verkefni, evrópsku samstarfsverkefni skóla þar sem fjallað er um hamingjuna. Þeir hafa nýverið tekið sér góðan tíma til að vega og meta ýmsa þætti sem hafa áhrif þegar um hamingju og óhamingju er að ræða. Í frétt hjá Sísýfos heimspekismiðju má lesa um framvindu samræðunnar.

Thinking – tímarit um barnaheimspeki

Tímaritið Thinking er gefið út af IAPC (The Institute for the Advancement of Philsophy for Children) við Montclair State University í New Jersey. Nýjasta tölublaðið (volume 20) er helgað verkum Matthew Lipman og Ann Margaret Sharp sem voru frumkvöðlar í barnaheimspeki, stofnendur IAPC og sátu í ritstjórn Thinking. Ann og Mat létust bæði árið 2010 og er þeirra beggja sárt saknað af heimspekingum og kennurum frá öllum heimshornum sem nutu þess að vinna með þeim og læra af þeim. Sýnishorn úr nýjasta tölublaði Thinking má nálgast hér og umsókn um áskrift að tímaritinu má nálgast hér.

Hæfniþrep samfélagsgreina í framhaldsskólum

Næstkomandi miðvikudag, 14. nóvember, klukkan 16:30 í stofu 11 í MH er boðað til opins fundar fyrir kennara í samfélagsgreinum í framhaldsskólum.

Tilefnið er að ráðuneytið hefur látið vinna viðmiðunarramma fyrir félagsgreinar, svipuðum þeim sem finna má í lok Aðalnámskrár fyrir íslensku, stærðfræði og erlend tungumál (bls. 91 og áfram). Að þessu starfi hafa komið kennarar ólíkra félagsgreina auk fulltrúa úr nefnd sem skrifaði sambærilegan kafla í Aðalnámskrá grunnskólanna.

Á fundinum verða lögð fram fyrstu drög að þessum hæfniviðmiðum og rýnt í þau en 1. desember er stefnt að því að þessari vinnu ljúki. Betur sjá augu en auga og mikilvægt að fá sem flest sjónarmið fram á þessu stigi málsins. Útkoman verður notuð til leiðbeininga við áfangagerð og þrepaskiptingu áfanga og viðmiðunar fyrir ráðuneytið þegar áfangalýsingar verða metnar.

Allir hvattir til að mæta og nota tækifærið til að hafa áhrif á mótun hæfniviðmiðanna.

Fréttabréf nóvember mánaðar

Fréttabréf nóvember mánaðar er komið út. Meðal efnis eru fréttir af málþingi félagsins, þingsályktunartillögu um heimspeki sem skyldunámsgrein, nýrri námskrá, nýju veftímariti og loks er kennsluseðill sem lýsir samræðuverkefni um sjálfið.

Viðtal við heimspekikennara: Ylfa Björg Jóhannesdóttir

Í október 2012 tók Heimspekitorgið viðtal við Ylfu Björg Jóhannesdóttur, heimspekikennara við Landakotsskóla í Reykjavík. Continue reading Viðtal við heimspekikennara: Ylfa Björg Jóhannesdóttir

Málstofa: gagnrýnin umræða um fjármál

Verkefnið Efling kennslu í gagnrýninni hugsun og siðfræði mun á næstu misserum standa fyrir hádegismálstofum þar sem tengsl gagnrýninnar hugsunar og siðfræði við önnur svið veruleikans eru skoðuð. Fyrsta málstofan verður haldin fimmtudaginn 1. nóvember klukkan 12:00–13:00 í Odda 106 og verður efni hennar fjármál.

Breki Karlsson forstöðumaður Stofnunar um fjármálalæsi og Eyja Margrét Brynjarsdóttir heimspekingur munu halda erindi um mikilvægi gagnrýninnar og upplýstrar umræðu um fjármál og eðli peninga.

Það eru Rannsóknastofa um háskóla, Heimspekistofnun og Siðfræðistofnun sem standa að verkefninu.

Málstofustjóri: Henry Alexander Henrysson

Leshefti um grunnþætti menntunar

Námsgagnastofnun hefur gefið út þrjú leshefti sem skýra grunnþætti menntunar í nýrri Aðalnámskrá. Hvert hefti fjallar um einn grunnþátt og er hugsað sem ítar- og skýringarefni við almenna hluta Aðalnámskrár sem gefin var út 2011. Þau leshefti sem nú eru komin út fjalla um læsi, sköpun og lýðræði og mannréttindi. Þrjú hefti til viðbótar koma út eftir áramót og munu þau fjalla um sjálfbærni, jafnrétti og velferð/heilsu.

Koma grunnþættirnir heimspekinni við? Hvernig getur heimspekileg samræða í skólum stuðlað að auknu lýðræði, meiri sköpun og bættu læsi? Continue reading Leshefti um grunnþætti menntunar

Örnámskeið í siðfræði

Laugardaginn 27. október n.k. verður annað örnámskeiðið á vegum Siðmenntar og Sísyfosar heimspekismiðju haldið. Að þessu sinni verður athyglinni beint að siðfræðinni sem er ein af greinum heimspekinnar. Þátttakendur fá að takast á við ýmis siðferðileg álitamál og kynnast lítillega nokkrum algengustu siðfræðikenningunum. Continue reading Örnámskeið í siðfræði